Sogn Gion Nepomuc, marter.

pdf: cheu l’entira historia
Ils 16 da matg: Sogn Gion Nepomuc, marter

Sogn Gion Nepomuc ei naschius igl onn 1330 a Pomuc en Boemia ord zun pietusa famiglia. Gia tier la naschientscha ha il tschiel dau claras enzennas, ch’el hagi da daventar in grond survient da Diu. Ina flomma zun clara ei vegnida da tschiel sur dalla casa nua che Nepomuc fuva naschius. Cun circa tschun onns rispundeva el mintga damaun marvegl la sontga messa. Cun ses buns talents ha el saviu studegiar sin l’universitad da Prag teologia e dretg canonic. Finiu ses studis, ha el giu l’inspiraziun da vegnir augsegner. Per sis jamnas va el en in liug solitari, fa ils execezis spirituals cun urar, giginar e meditar. Lu ha el retschiert tut ils sogns uordens e ladinamein fatg il predicatur e quei aschia che biars vegnevan muentai tier larmas. Pli tard ei Nepomuc daventaus canoni e predicatur dalla baselgia principala da sogn Vitus a Prag. Ses priedis drizzava el als pucconts per muentar els tier la penetienzia. Il retg Venceslaus da Boemia tedlava sez bugen ils priedis dil sogn Nepomuc e suandava ses cussegls. Era la regina Giuanna veva anflau quei sogn per siu confessur. Aschia ha el biars onns saviu purtau il plaid da Diu cun bia fretg en la baselgia dil dom da Prag. Per impedir il bien progress ch‘il sogn fageva cun ses priedis e sias ductrinas, ha il demuni dumignau ch’il retg Venceslaus ha calau da tedlar quels. El daventa freids e sesurdat als vezis mundans. Per buca stuer tedlar las admoniziuns da sia buna dunna Giuanna, ha el bandiaschau ella ord sia cuort. La cumbrigiada anfla confiert mo tier Diu e siu confessur cun prender savens penetienzia e retscheiver ils sogns Sacraments. Gest perquei ch’ella prendeva savens penetienzia, teneva il retg per pusseivel ch’ella seigi era schi schliata sco el, ni ch’ella mondi a lamentar sur dad el. Pia damonda il retg il sogn tgei che sia dunna hagi da confessar. Il sogn sesmarveglia da tala damonda, el che dueva saver dil secret dalla confessiun. Cheu smanatscha il retg cun da tuttas sorts turments. Il sogn confessur tema buca las smanatschas e lai cavar o gnanc in plaid. Sin quei dat il retg il camond da metter il sogn sil vid il tgierl. Sogn Nepomuc bein consolaus d’astgar pitir quels turments per mantener il sacramental dalla confessiun, pronunziava nuot auter che Jesus e Maria! Il tiran che spitgava adumbatten sin quei ch’el leva, ha entschiet a temer la rebelliun dil pievel e dau liber el dil tgierl. Strusch a casa, fuvan las plagas mdegadas ed el ei puspei ius sin scantschalla e cuntinuau cun gronda premura siu survetsch apostolic. Lura en siu davos priedi ha el dau d‘entelgir ch’el hagi prest da murir. El ha profetisau che sur dil reginavel da Boemia hagien gronds castitgs da vegnir: uiaras e heresias, sco igl ei lu era daventau. El serecamonda allas oraziuns, roga tuts per perdun, dat il davos pietigot e lai leu igl auditori tut tementaus. Paucs dis suenter pelegrinescha il sogn tiel maletg miraculus da …