Sontga Margreta, regina dalla Scozia.
pdf: cheu l’entira historia
Ils 10 da zercladur: Sontga Margreta, regina dalla Scozia
Quella sontga ei naschida entuorn igl onn 1048 ed ei stada in ver maletg d’ina dunna cristiana. Ella fuva niazza dil retg Edmund il secund dall’Ungaria. Gia els giuvens onns fuva ella plein pietad e deva enzennas da daventar ina gronda survienta da Diu e mumma dils paupers. Siu pli grond plascher fuva da star en aduraziun avon il Sontgissim Sacrament digl altar, pertgei leu anflava ella adina siu pli grond confiert. Suenter la mort dil bab fuss Margreta bugen ida en claustra. Mo siu aug Eduard III, che fuva retg dall’Engheltiara ha vuliu ch’ella semaridi cun Malcolmo, retg dalla Scozia che veva dumandau ella per spusa. Diu ha benediu quella lètg cun sis fegls e duas feglias. Regina Margreta ha cun migeivladad ed en tema da Diu educau bein ses affons. Il retg teneva schi ault sia virtuusa regina ch’el ha vuliu ch’ella regi il reginavel ensemen cun el, sinaquei che tut ils subdits vegnien entras siu exempel manteni pli tgiunsch en pasch e ruaus. Els vulevan era che la pietad e la devoziun creschi, pertgei da gliez temps fuva il reginavel dalla Scozia en pauc bien stan. Perquei intent ha Margreta schau vegnir da lunsch neutier sogns e premurai predicaturs. Lu veva ella era l’autoritad da far diever dil scazi roial ed entras quei ha ella saviu gidar ad ornar las baselgias cun schubra e custeivla paramenta. Biaras baselgias ein vegnidas per part restauradas ni baghegiadas da niev. Era ha la sontga baghegiau claustras per muniessas e spitals pil basegns da scadin. Dapertut numnav’ina ella la mumma dils paupers, pertgei adina fuva ella tschinclada d’orfans e paupers rugadurs. Mintgadi spisgentava la cuort da quei da 300 paupers e la regina tgirava lu aunc sezza ils malsauns e schubergiava las plagas. La gronda part dalla notg passentava Margreta cun urar e meditar. La damaun tedlava ella quater tochen tschun sontgas messas en sia caplutta. Quei schava ella era buca sut duront sias grevas e liungas malsognas, ch’ella supportava cun gronda pazienzia. Specialmein sia davosa malsogna ei stada in’emprova el purtar las cruschs che Niessegner tarmetteva. Paucs dis avon sia mort veva ella detg a quels che fuvan leu presents: Oz schabegia ina gronda sventira pil reginavel dalla Scozia! Pauc suenter
arriva in currier cun las trestas novas che siu mariu e siu emprem prenci Eduard seigien curdai en la battaglia encunter il retg Guglielm dall’Engheltiara, numnaus il tgietschen. Da quella tresta nova veva la sontga regina giu ina revelaziun gest el mument che la battaglia fuva stada. Aunc en quei onn 1093 ha ella sentiu che sia veta mondi alla fin. Cun speciala devoziun ha Margareta retschiert ils sogns sacraments e rugau siu confessur per duas caussas. L’emprema seigi da mintgadi far memoria dad ella en la sontga messa e lu da tener tier a ses affons da viver adina en tema da Diu sco quei ch’ella vevi mess avon ad els. Cun pronunziar il sontgissim num da Jesus eis ella morta beadamein ils 10 da zercladur igl onn 1093. La tristezia fuva gronda, cunzun dils paupers per lur buna mumma. Il sogn tgierp ei vegnius satraus en la baselgia dalla Sontgissima Trinitad ch’ella sezza veva schau baghegiar ed en la quala ella veva giu las nozzas. Zun biaras miraclas ein daventadas tras urbida dalla sontga regina Margareta, patruna dalla Scozia ch’ei tras quei vegnida canonisada igl onn 1251 da papa Innocenz IV.